Le man

Poder strenzer ‘na manina
d’un bambin, fa teneressa;
sta…robeta picinina
t’impenisse de docessa.
Pur la man de un amigo
la te pol scaldar el cuor,
se dasseno xe ‘n amigo,
te la strenze co’ calor.

Pianzi, no’te vergognar

Xe cussì che me diseva
lu strenzendome al peto;
tanto ben me conosseva,
me tegniva streto, streto.
Le campane che sentivo
de San Marco, me ingropava;
suono grando, largo, vivo,
e vissin lu me restava.
Da lontan pur mi le sento
ste campane co le canta,
quela voze vien col vento,
l’emossion mia xe tanta!
Desso sola, a quel sonar
penso quel che lu diseva
-pianzi, no’ te vergognar!-
mentre forte me strenzeva!

La verità (no’ sempre se pol dir... manco ancora se pol... zigàr!)

Gran silensio, note fonda;
un lumin solo s-ciarava
el barcon che a la sponda
ben ligà el dondolava.

I do omini intrigai
a tegnir i oci verti,
i sercava zo cuciai
de restare un fià coverti.

Un barchin se taca a lai,
“ Quale merce dichiarate?”
-Merda! ziga, or svegiai,
“ Documenti presentate!”

Gera quela al controlo,
ch’el barcon svodava fogne,
ma quel zigo, quelo solo,
procurà ga multe, rogne.!

In Botega dee specialità venessiane

De tegnirse più podeva…
el gaveva mal de pansa!
la botega no’ gaveva
el servissio de creanza!
Tien el fià… xe anca peso..
sente sgrisoli de fredo !
no’ ga po’ gnanca un mezo…
desperà el xe , lo credo!
Pian el va verso la porta,
co’ fadiga ben la sera,
par cuciarse el se posta
sul zornal puzà in tera.
Finalmente.. un bel respir..
po’ co’ carta de regalo
e nastrin da suvenir,
fa un paco color zalo.
Al momento de chiusura
vol andar verso el “ Liston”
el pacheto tien co cura
par butarlo in un bidon.
Ma un ( alt !) desso lo bloca:
-Cossa xe che porta in man ?
Lu storzendo un fià la boca,
vol spiegar, ma massa pian !
-No’ xe merce dichiarada
serto,- dise el finanzier.
“ Noo ! ma xe ‘na gran monada
che xe megio no’ veder…”
-El se spieghi, ben me diga,
po’ me verza el pacheto!-
“ Caca xe “ e squasi ziga,
“ da butar nel cassoneto !”
La Finanza vede solo
tuto quanto contrabando,
ciapi qua, ghe lo molo,
se lo porti al comando!

Voga Veneta- le Barche - le Regate.

Vecie foto sto vardando,
xe le barche in “ Regata”.
La rivedo ricordando
Pur quel dì de vecia data.

Gera sandoli, batele,
mascarete, dodesona,
po’ la sola tra le bele
pur la grande DISDOTONA !

Co’ le barche impegnai
vogatori ben vedemo
ne le voghe deventait
tuto un col proprio remo!

VOGA VENETA fiorente,
armonia xe e forsa,
e chi voga ben la sente
la passion par la so corsa!

Voga, festa de colori,
ghe soride la natura,
festa xe dei vogadori,
con la voga bela, pura !

Querinoti 1957 (fiosofia de vita venessiana)

“ Chi beve bira, campa sento ani “
chi beve vin…forse anca più!
I Querinoti zovani, anziani,
davanti al goto i sofre più
e tra lori, veci in… fresca,
se diverte, ziga, canta,
par lori in fondo xe na festa
trovarse tuti ne la locanda
dove tra i litri de bon nostran,
i fa progeti par na’ gita,
xe d’acordo, co’ l’ombra in man,
de star alegri in questa vita !
Tuto i desmentega co se trova,
putei torna, e ghe fa ben
parlar de barche, cantier, voga,
i torna zoveni, col cuor sereni!
Saria de farghe un monumento
a sti altleti d’altri ani
che ga sempre in popa el vento
sopranomi pur nostrani:
Moleca, Peta, Vovo, Baraca,
Nono, Bugnigolo, Nasocarton,
Dotorpadela, Raffaelo, Fraca,
Tanaia, Cicio e Penolon !

Or bevè, ma in malora !
ste atenti a le bale !
che se no, co’tornè fora,
trovarè treta la cale!

El Gondolier

Elegante el so andar
su la gondola col remo,
armonioso el so vogar,
de mirarlo ne godemo.

Gondolier vol dir VENEZIA,
lo conosse tuto el mondo,
tanti ama sta Veneza
de amor vero, profondo.