El Monte Grappa

Chi xé Veneto e nol conose el Monte Grapa el se ciame fora parchè tuti o prima o dopo nea vita i ghe va e i se o ricorda. Coi so 1775 metri el xé un belvedere straordinario al sentro dea nostra tera. Da in sima vardando a mesodì se vede tuta a pianura fin al mar con Venesia e quando xé proprio beo limpido anca i Apenini; a setentrion se abrasa tute e montagne dae Doeomiti ai ghiaciai de l'Adameo; in fianco a levante el ga el fiume Piave e a ponente el fiume Brenta con tuto l'altipiano de Asiago.
Na volta, quando no ghe gera a Tivù coe so prevision del tempo, gera Lu che lo segnava: i veci disea che quando el Grapa ga el capeo o piove o fa beo. El Grapa xé na maraveja in tute e stajon. In primavera xà a fin de febraro in basso se incontra in meso ae foie seche i primi fioreti ma xé de istà che tuta a montagna se riveste de fiori e de profumi. I prai che fin aeora gera siensiosi i xé animai dai campanasi dee vache al pascoeo e nee malghe se pol sajar un toco de formaio fresco de montagna e bere un par de ombre de vin. Soe strade e soi sentieri se incontra tanta zente de tute e età che inamorai de sta montagna i va su a piè o in bicicleta. Gino, che co Ivano, Roberto, Franco, Albino, Tiraca e Tilio tanto ghe piaseva caminar sol Grapa, el voea dopo morto na lapide so na rocia che o ricordase: adeso o gavemo contentà.
E me ricordo de Mario che prima de emigrar in Sudamerica el ga vosuo andar in Grapa par tor na stea alpina de ricordo ma l'inesperiensa o ga tradio e el xé restà qua par sempre. Urbano invese ch'el xé nasesto in Argentina el xé venuo a 70
ani aposta par veder dove gavea combatuo so pare che gera ragaso del 99 e tornando el se ga portà là come testimone un toccheto dea so rocia. Anca Emilio e Eugenio de Casteo i xé deventai famosi parchè so sta montagna i ga pasà na vita e, se ocoreva, da soi i netava i sentieri e i ghe ne verzeva de novi. Xé un spetacoeo indimenticabie andar in Grapa co na bea jornada quando l'azuro del cieo abrasa a montagna e l'orizonte se estende tuto intorno a perdita de ocio e dee volte, coe nuvoe xé basse, te par de caminar sora de lore come voear. Ghe xé anca quei che i voea sul serio col deltaplano o parapendio e i vien da tuta Europa tanto xé beo. Ma ghe xé posto anca par chi va in machina o moto e i vol gòdarse el panorama e el fresco sensa far fadiga.
De autuno l'aria se fa pì fresca e i boschi de fajo par che i ciape fogo. A xé l'ora dei caciatori che i camina tuto el dì par ciapar qualche gevaro e dei fungaioi che i va de matina presto coea speranza de trovar un bon pasto de ciodeti o de chi se contenta de un pochi ma gustosi maroni.
Co riva l'inverno finise a confusion e riva el silensio. Mentre in basso a pianura xé coerta daea nebia, qua in sima a neve e el soe che brila limpido, te invita a fare un bel gireto coi sii in piena libertà e a gustare a natura come Dio la ga fata. Par tuti dopo na jornada in montagna dove l'aria fina fa apetito, ghe xé drio a strada e in basso nea pedemontana agriturismi e ristoranti par tuti i gusti e scarsee. Se pol anca andar zo' par da drio e passar par Feltre e a val del Piave o far a Valsugana che a xé spetacoare. Ai piè del Grapa ghe xé a vae de Santa Feicita, dove chi ghe piase rampegar i pol alenarse par far dopo robe importanti. Quando che andavo mi ghe gera un bel grupo de zente che vegneva da Basan, Citadèa, Castèo e anca da Padova e Venesia:
ghe gera el Ghigno, Polvareta, el Bagnin, Andalù, Tulio, Acqua e Sucaro, el Vecio, el Bocia, Barison, l'Orso, Zonta e tanti altri. Aea matina tuti pronti a rampegar ma dopo mezodì zo' a magnar bevar e cantar per finirla aea sera mèsi in baea da Nardini al ponte vecio de Basan. Adeso i me dise che quei che a frequenta i xé più seri: i beve soeo suchi de fruta.
Ma el Grapa tanto beo, par imposibie, xé sta nea prima guera mondiae un campo de batalia. Xé suceso anca questo e se vede ancora i resti dee trincee longhe chiometri sora a montagna e e caverne scavae nea rocia dove se pol trovar ancora scheje de granata, gavete rote rusinie e altro che ghe serviva ai pori soldai. Quei che i xé morti, e i xé tanti, sia Italiani che Austriaci, Ungheresi e altri i riposa in sima nel simitero de piera bianca e a statua dea Madona coi fiori d'istà e a neve d'inverno ghe tien compagnia. Ogni 4 Agosto ghe xé a comemorasion uficiae e a banda sona a canson del Grapa ma, sempre durante tuto l'ano, tantissime persone visita con rispeto quel posto unico che no se sa se apartien al cieo o a tera: nel silensio, e note del canto Stelutis Alpinis
e pare nate dal vento e dae nuvoe. Più in basso nei prai e nei boschi i turisti dea domenega i magna, i se riposa sull' erba, i tosi core, i morosi se tien streti, i sportivi i fa fadiga e i sua soto el soe, e vache pascoea tranquie. El xé un posto bon da portar i zovani par scoprir a beesa dea natura e conoscer a storia del mondo e dei omini. Nea so longhisima vita, i esperti dise de dosento e passa milioni de ani, aea quae Don Paolo Chiavacci con altri amisi dea casa Don Bosco de Grespan ghe ga dedicà un bel libro, el Grapa ghe ne ga visto de tuti i coeori. All'inisio, col gera in formasion deposito su deposito par milioni de ani soto el mar, el gera circondà dae prime forme de vita, tuti esseri strani che adeso se pol veder fosilisai nee roce. Dopo col ga cominsià a emergere, el ga dovuo soportar
maremoti e teremoti spaventosi coi vulcani che butava de tuto pèso de un inferno. Quando tuto se ga calmà un poco e el caldo xé deventà soportabie, el ga visto i primi albari spuntar e i primi rétii che i vegneva fora dal mar e i provava a strisiar par tera.
Li gà visti col tempo trasformarse e deventar animai giganteschi, quei che ciamemo dinosauri, che i se lotava un con l'altro pea supremasia finchè anca quei i xé scomparsi. Dopo el gran caldo xé venuo el gran fredo e, oramai deventà grando, el Grapa par mileni el xé stà soto na coverta de giaso e dopo de queo xé rivà i diluvi che durava sentenari de ani, finchè un poco aea volta el se ga chietà e el ga ciapà a finosomia de deso. Oramai tranquio, diremo ancò andà in pension, ga comisià a creser el tipo de erbe e albari che vedemo e orsi, pantere, lupi, mammuth, cervi gera i paroni dea montagna. In mèso a ste bestie feroci el ga visto anca dei mèsi simioti, tuti pieni de peo che i corea de qua e de là coi bastoni par copare qualche bestia e magnarsea.
Pì tardi el ga visto altri omani un poco meio che i vegneva nea montagna in serca de piere da spacare bone par far cortei, pontaroi, ponte de lance e frece e ani e ani dopo altri che i girava vestii de pee de animai par ripararse, i parlava tra de lori e i tajava alberi par far fogo e far costrusion. Secoi dopo xé aparsa altra zente che i se ciamava Euganei e dopo de lori da lontan ghe nè rivà de novi, i Veneti che i ga costruio e so case tuto intorno.
Dopo n'altro bel toco de tempo se ga presentà i Romani che, ben organisai, subito i ga comisià coe piere dea montagna a costruir strade e cità, ma dopo de lori altri cativi come a peste i ga distruto tuto e a zente par salvarse a ga dovuo scampar in meso ai so boschi. Pì tardi el ga visto che i costruia cese e castei e da insima ae tori i paroni che vardava curiosi sta montagna granda che gera davanti e che d'inverno par prima a se coverseva de neve.
Dopo xé venuo i Venesiani col so leon e dopo de lori el ga visto anca Napoleon col so capeo de traverso che el ghe corea drio ai Austriaci e questi che dopo tornava par andar via de novo parchè rivava i Italiani. Da là insima el Grapa vedeva tuto ma nol se scomponeva granchè. Lù de inverno dormia soto a neve e de istà col soe eo scaldava, tornava a vita nova. Intanto a popoeasion gera cresua e par trovar legna par far fogo e erba pae bestie i andava sempre pì su nea montagna. El Grapa bon, el ghe asava far parchè el capìa che i gavea bisogno, se no i dovea andar a viver lontan
e anca parchè i ghe tegneva compagnia. Oramai el gaveva fato amicisia coi omani e el ghe dava tuto queo che el gavea: erba bona pae vache, legna par el fogo e par costrusion e d'inverno a neve par l'acqua d'istà. Mai el gavaria pensà che i omani de colpo i deventasse come mati e proprio insima a lu i'ndase a coparse. Cossa che i ghe ga fato se pol vederlo ancora adeso: i o ga tormentà con un mucio de fori e de taji, i o ga sbusà da tute e parte coe bombe, i ga brusà l'erba e i alberi. Nol savea che i omani dee volte par difenderse o atacare i fa questo e altro. El ga sofrio tanto insieme a quei che i combateva là, ma el se ga comoso quando el ga visto tanta zente morir par difendere a so sima. Pochi ani dopo el ga visto ancora guera, mostri che voeava pì alti de lu e che moeava bombe dapartuto anca soe case e a zente che ancora scampava in montagna par salvarse. Adeso che xé pasà anca questa e l'erba e i alberi xé ricresui, tanti va su a trovarlo par passar na giornada in
armonia coea natura. I se ferma a mèsa costa soto castagnari sentenari o pì in alto al'ombra de magnifici faggi o pini profumai, oppure i preferise caminar anca par ore e ore, nei prai in alto dove se pol incontrar fiori meraviliosi daea stea alpina al rododendro, gensiane, ranuncoi, narcisi, campanule, gili de montagna e tanti altri parfin orchidee, parchè el Grapa ga un clima particoeare adato ae specie alpine e anca mediteranee. Però sti ultimi ani, quando ogni matina el varda in basso nea pianura che a xé quasi na so creatura, el vede sempre pì case e fabriche e un mucio de machine che core dapartuto e tanta zente foresta. El se acorse anca che ghe xé alberi che more e in cieo manco arcobaeni dopo i temporai, e manco stee de note, che ghe xé pochi osei che voea, pisi in te
l'acqua e tosi che zoga e, co a so sagesa de milioni de ani el pensa: cossa xé drio sucedere qua? Tegnarò i oci verti. Questo xé queo che el Grapa fin desso ga visto e el vedarà ancora tante robe che noaltri ne piasaria saver ma no faremo in tempo: Lu, ch'el sta là ancora par tanto, el ghe ne vedarà dee bee.

Ste righe xé dedicae a chi ga combatuo sul Grapa e ai amisi de sta meraviliosa montagna.
copyright Venetoimage

S. Tabacon