A xé na pasion


Èsare apasionai de calcosa xé na bea roba, ansi se pol dir che xé come el sae nea menestra parchè ghe da gusto aea vita e chi no ga pasion el xé un tipo sospeto. Ghe xé chi che speta dal luni al sabo par far finalmente aea domenega queo che ghe piase o adiritura i speta da un ano a l'altro el momento bon. Pasion ghe nè de svariati generi ma, anca a pì strana, vaeorisa a persona e a rende un pò particoeare. Eco aeora tuta na serie de personagi carateristici. Ghe xé el pescador coi so bei stivaeoni ch'el sta par ore tuto feìse in mèso a l'acqua geida e, quando finalmente el ciapà un pése s'el xé picoeo, lo ributa dentro e el cominsia co costansa tuto de novo. Se podaria dir chi ghe o ga ordinà. A xé na pasion e basta. Lo steso se pol dir dei caciatori, quei che d'inverno aea matina
presto, i va in laguna e i sta imobii con un fredo can dentro a bote tirando i oci e par scaldarse i ga soeo a graspa ma, se i ghe ne beve màssa, dopo i sbàlia anca a mira. Altri ancora i va in giro pai campi col can de rasa e i varda pì el can che el fajan che salta e par questo qualche volta el ghe scampa. N'antro genere de cacia a xé quea ai osei de pasajo coi caciatori sconti nei cabioti pronti a tirar a fiancia coi riciami quando se avisìna un sciapéto de lodoe ma, se i ciama in tanti, i osei par no farghe torto a qualcun, i tira drito. Aeora par scusarse i dise che i pasava alti, che no i gavéa fame, che el tempo no gera giusto o altre scuse a l'ocorensa. Ghe xé anca quei che ga poco tempo ma schei e i va in riserva. Là prima i paga e dopo i ghe buta davanti al sciopo, anare, fajani, gevari de
alevamento mèsi intontii, e lori pan, pan, pan, copa tuto e i torna casa contenti. Un tempo che tuto servia par sfamarse, i doparava i rocoi, e rete, el paeon coe visciae coi quai i fasea manbassa de tuti i osei. Adeso sta pratica barbara xé proibia e par questo xé ben difìsie incontrar un bon pasto de poenta e osei come a tradision comanda: pasiensa! Ghe xé anca quei che i va a sciosi e te i vidi dopo a piova in mèso a l'erba moia, a ciapàr ste bestie che poarete, se o sa, no e fa tempo a scònderse. N'antra bea pasion a xé quea de sercar funghi nel bosco e qua me meto in mèso anca mi. Se sa che i funghi vien principalmente verso a fin de l'istà e in autuno, cussì quando riva a vose che ghe xé na butada, quei che i speta da un ano con impasiensa, i deside de andar suìto par no farsei portar via dai altri. Eco che a matina drio se pòl védar na machina che col scuro a se dirige par a strada ancora deserta, verso a montagna. Sensa fermarse, dopo un'ora a imboca a vae dea Cortea, streta e tuta curve che a te imbriaga aea matina presto sensa bere e, poco dopo, co comisia a far ciaro, a se ferma ai pié de un bosco che quèrse tuta a montagna. Smonta cinque tipi, i se stirachia un poco, i sbaìsa una-do volte, i varda in alto come se mete el tempo e, in siensio, zaino in spaea, i s'incamina su pal sentiero. Dopo un'ora e mèsa de camin tuto
in saìta, i riva sol posto giusto e, un de qua n'antro de là sempre in siensio par no ciamar l'atension, i comisia a vardar tra l'erba alta e soto i pini. Quando i vede spuntar calcosa de scuro, i se avisìna trategnendo el respiro e, dopo na ociada intorno par veder se ghe xé calcosa altro de bon, i se cucia par torlo, tuti emosionai. I va avanti par qualche ora su e zò par i pendii se a giornada buta ben, se no xé mejo girar i tachi e tornar. Quando riva e diese e a stanchesa se fa sentir, xé ora de fermarse e, come d'acordo, i se trova insieme aea forcea Boalon par tirar el fià e bere un gióso. Adeso che i xé tuti là se pol conoserli. I xé i cinque Cavalieri dea Confraternita del Fungo Porcino: Bepo coea so barba da fiosofo, Bain el pì robusto, Edo l'unico che parla italian, Sante coea crapa mèsa peada e el naso da batistrada e Sergio el pì grando. Sergio, che par l'esperto del grupo, el ghe mostra ai altri el fungo pì beo pena trovà, lo tien in man come el fosse na piera presiosa, lo varda de sora e de soto e dopo che lo ga parfin snasà, lo rimete nel sesto coea deicatesa riservada a un puteo pena nato. El brontoa un poco vedendo i pochi altri trovai e el dise che a xé magra parché d'inverno xé venua poca neve e che ani indrio a gera mejo, ma dopo el se consoea coea sodisfasion de aver trovà almanco calcosa par far un bon risoto. Lu el conose anca tute e altre
specie de funghi che vien nel bosco e le ciama col so nome latin parché el se ga fato na cultura in materia sui libri. Poco dopo i deside de andar al maso par magnar calcosa. Coi riva, sensa perdar tempo, i impisa el fogo e i mete nea graea salsice e costisine che dopo i magna de bon apetito e i ghe beve drio un pochi de bicèri de vin e el cafè coea coresion. Ben rinfrancai, i torna zò par sentieri poco batui par no incontrar curiosi, i passa davanti al capiteo de San Antonio che i ringrasia par a bona giornada, e dopo mèsa oreta, rivai aea machina col presioso botino intato, i ciapa rapidi a via del ritorno. Apena casa, mentre e done se mete a curar i funghi e prepararli, i nostri anca se stufi, i va al bar e i conta che i ghe ne ga trovà un mucio tanto par farghe rabia ai altri. Par finir i se trova aea sera drio davanti a un bel risoto e a un piato de poenta e funghi compagnà da qualche bona botilia de rosso che, come se dise, xé un magnar da re. Alcuni, no tanti ma boni, xé apasionai de far escursion in montagna. El xé un sport che insegna ad amar e rispetar a natura ma un poco pericoeoso se fato da chi no xé alenà o pèso xé imprudente. Saire na montagna e rivare in sima dove te par de esser el primo, xé na gioia e un bel ricordo e uno pensa de aver scrito un poca de storia de quea
montagna. Par pasàr a altri generi, no se pol trascurar quei che ga pasion de andar in bicicleta sia so a strada che soi sentieri. A bicicleta xé uno sport dei pì praticai e se vede in giro zente de tute e età che, in grupo o da soi, i fraca soi pedai soto el soe o a piova, i sua e i manda fora anca l'anima par aver a sodisfasion, rivai in sima, vardando in basso, de dir: ghe a go fata! E dopo lanciarse in una entusiasmante discesa. Ghe xé altri che per raggiunti limiti d'età no i va pì in bicicleta ma, tanta xé a pasion, che i dedica el so tempo libero a seguir i zovani e organisa corse e trofei par tegner sempre viva sta pasion. Daea bicicleta pasémo al calcio volgarmente deto baeon che a xé na gran pasion tanto che un tempo ogni paese gavéa a so squadreta. Adeso pì che zugare in
campo, i ghe ne parla tanto al bar o aea teevision e tuti sa de tuto e no ghe xé segreti che tegna par zogadori, formasion e campionati. I tosi zovani apasionai de sto sport quando i comisia a far e prime partitee, xà i ga in testa i so campioni e pol sucedare che, se no i deventa come lori, i se senta anca frustrai. Resentemente xé nate altre pasion e ghe nè par tuti i gusti: go visto parfin un puteo de quatro ani che imparava el karatè. Tra i ultimi rivai ghe xé i amanti del deltaplano e del parapendio che, come fiori, i coeora el cieo coe so vee. Ghe xé tra questi un prete che so richiesta, el ceebra anca matrimoni par aria. Cambiando proprio genere, se pol discòrar un poco de quei che ga pasion de l'abronzatura. D'istà i se sobarca ore de caldo asfisiante dentro e machine, in fia, co l'usma
de rivar presto in spiaja par ciapar finalmente a famosa tintarea parché anca l'ocio vol a so parte. L'importante xé méterse al soe nel posto giusto. D'inverno i pì sfegatai i xé nea neve al fredo con un specio par farse a facia pì scura intanto che e man ghe resta bianche. De sta categoria fa parte anca i culturisti che i màsena ore de paestra e ogni dì i controea giustamente se el muscoeo cresce. No desmenteghemose dei tanti apasionai dee bestie e pì varie: can, gati, osei, parfin serpenti e iguane ai quai i ghe dedica tuto el so tempo libero. Conoso na signora che prima a se alsava co comodo ae nove ma adeso, che a ga tolto un bel cagneto, a se alsa ae sie par farghe far a pasegiata matutina e i so bisognini. E dopo i dise vita da cani: ma par chi? Ogni età ga a so pasion.
Na volta, co gèrimi boce, ne piaseva coesionar baéte de vero, querceti, bui, figurine de zogadori. Adeso i tosi stravede par i dinosauri e par i mostri de Pokemon. Se pol ricordar anca tuta a serie dei coesionisti che xé apasionai dei ogeti pì rari e strani: robe vece, quadri, mobii, botilie de vin, machine e atresi dei tempi andai etc. Un conoscente el ga na Ferari e tanto a ghe piase e el xé geoso che la tira fora dal garage soeo do o tre volte a l'ano par spolverarla e gonfiarghe e gome e dopo la sconde de novo. I apasionai dee moto sportive super decorae invese te i noti subito parchè i se tira drio coea moto mèsa botega de acesori. Interesante ma scomoda xé a pasion de vardar e stee col canociae. I sta al scuro e al fredo par ore, spetando che co comodo se alse Marte e
Venere ma, a sodisfasion xé tanta se i riese nel fratempo a scoprir na stea nova. Anca i apasionati de fotografia i deve aver na bona dose de pasiensa quando, par trovar l'inquadratura perfeta, i speta par ore. Tra e done, alcune xé apasionae de far conserve e marmeate con tute e spece de fruti parfin coi stropacui (rosa canina) che par torli i te sbrega man e maneghe e, soeo dopo ore de lavoro e de pasiensa, se otien un poca de marmeata ecesionae ma che a vien costar come l'oro. Tra e pasion particoeari ghe xé anca quea de un me amigo par tuto l'ano impegnà nei afari ma, el dì che i copa el porseo el xé sacro e nol vol saver de gnente: aeora el moea l'uficio, el se mete el camisoto e el se diverte un mondo a taiar, impastar e far su coe so man, saeadi, sopresse,
museti che pì tardi el magna coi amisi. Ghe xé quei che ga pasion dei schei: co sti qua te pol comisiar qualsiasi discorso e te pol star sicuro che te va a finir sempre là. N'antra gran pasion nasionae xé el zogo dee carte, dee machinete, del loto e de tuto queo che el bon governo mete a disposision dea dea Fortuna ma, quei che vol ciapàr massa, i core el riscio de magnarse anca ch'el poco che i ga. I stakanovisti del baeo xé n'antra categoria forte. Bel tempo, bruto, piova, nebia, no i se perde un sabo sera in saea da baeo. I xé sempre i soiti, i sente sempre a soita musica, i baea sempre i stesi bai e i se diverte un saco. Stesso discorso par i tosi che i va in discoteca, altro che i torna casa aea matina sempre su de giri e qualche volta no i torna gnanca casa. E par finir, parchè a storia sarìa
longa ma ghe demo un tajo, no se pol trascurar quei che xé apasionai dee femene e quee che xé pasionae dei omani par e pari oportunità come giusto. Ghe xé un amigo de na certa età che nol se pol proprio ciamar Adone ma fin dai banchi de scoea tuta a so vita la ga dedicada co costansa, schei e tempo drio ae femene e, a sentir lu, el xé ancora nel giro bon. Virtù nascoste. Co a xé pasion a xé pasion!

copyright Venetoimage

S. Tabacon